男人之苦

聖誕時份,因要替我校的聖誕 show 當基督徒合唱團的司琴,前陣子搬了我的私伙電子琴到學校。風捲殘雲的假日節目過後,昨日央求貴為車主階級的偉幫忙把電子琴搬回家,他正想推搪之際,我嚇了他一嚇:『替神的聖工做少少o野得唔得?』他只有唯唯諾諾地應承,但因他當夜有教會小組活動,我只有跟他一塊兒去。

當晚的聚會比較特別,並非位於教會內的常規靈修聚會,而是位於於尖沙咀某酒廊的一個 Men’s only 的聚會,與會者都是已婚的教友,只有我這個不速之客例外。當晚的話題節錄如下:

『唉!我結左婚先發覺原來我唔夠我老婆打。』
『一吵嘴她便使出一招黑豬旋風腿,把我踢落床。你老婆絕招係乜?』
『無,走落街然後等我 tum 番佢上樓囉。』
『咁咪幾好,我老婆最叻走返娘家,兩日都唔返屋企。』
『我仲慘,我老婆會迫我返娘家,兩日都唔比我返屋企。』
『唉!』

『喂!你老婆大唔大洗o架?』
『嘛嘛囉!』
『我老婆唔貴果件唔買o架。』
『咁我老婆又唔會買 D 唔應該買o既野o既。』
『咁咪幾好。』
『最幣佢連應買既都唔買,D 家用都唔知去晒邊。』
『唉!』

『蝦!你估今晚邊個o既老婆最快打電話嚟 check?』
『我!』
『我話係我!』
『不如打賭十蚊,最先收 call 果個輸。』
『咁唔開機咪實贏?』
『千祈咪,話說有次我唔記得開機,夜晚返到屋企後,老婆即刻撲埋嚟抱住我話:「老公,我好掛住你。」然後猛咁聞我件裇衫,聞下有冇香水味。』
『唉!』

『呀韋信,最好係你,未結婚,可以揹住個結他周圍去,結婚前,女仔純到好似的羔羊咁,結左婚後,女人肯定變得快過收音機轉台…﹝下刪一百字﹞』
『我話韋信其實有老婆,唔信既話,睇下佢夠唔夠膽衣家洒 D 香水係件裇衫道先返屋企。』
『或者帶佢落 xxx 然後指定要佢簽咭,睇下佢張月結單駛唔駛受審查。』
『駛乜咁麻煩,我今晚扮女仔聲,打電話去佢屋咪仲直接。』
『我……我淨係想知道你地o既靈修小組幾點開始?係邊?我好有興趣參加。』

92

Leave a Reply

Your email address will not be published. Required fields are marked *